ಹೆಲಿಕಾಪ್ಟರ್‌ಗಳ ಮೂಲಕ ರಿಯಾಕ್ಟರ್‌ಗೆ ಜಲ ಸಿಂಪಡಣೆ ವಿಕಿರಣ ಸೋರಿಕೆ ತಡೆಗೆ ಜಪಾನ್ ಹರಸಾಹ

ಫುಕುಶಿಮಾ/ಟೋಕಿಯೊ, ಮಾ.17: ಮಾರ್ಚ್ 11ರ ಭೀಕರ ಭೂಕಂಪದಿಂದಾಗಿ ಹಾನಿಗೀಡಾಗಿ, ವಿಕಿರಣ ಸೋರಿಕೆಯಾಗುತ್ತಿರುವ ಫುಕುಶಿಮಾ ಅಣುವಿದ್ಯುತ್ ಸ್ಥಾವರದಲ್ಲಿರುವ ವಿಪರೀತ ಬಿಸಿಯೇರಿರುವ ಅಣುರಿಯಾಕ್ಟರ್‌ಗಳನ್ನು ತಂಪು ಮಾಡುವ ಪ್ರಯತ್ನವನ್ನು ಗುರುವಾರ ಜಪಾನ್ ತೀವ್ರಗೊಳಿಸಿದ್ದು, ಇಂದು ಸೇನಾ ಹೆಲಿಕಾಪ್ಟರ್‌ಗಳ ಮೂಲಕ ಟನ್‌ಗಟ್ಟಲೆ ಸಮುದ್ರ ನೀರನ್ನು ರಿಯಾಕ್ಟರ್‌ಗೆ ಹಾಯಿಸಿದವು.
ರಿಯಾಕ್ಟರ್‌ಗಳ ವಿಪರೀತ ಬಿಸಿಯೇರುವಿಕೆಯಿಂದ ಅದರಲ್ಲಿರುವ ಇಂಧನ ರಾಡ್‌ಗಳು ಕರಗತೊಡಗಿ, ಅವು ಭಾರೀ ಪ್ರಮಾಣದಲ್ಲಿ ಅಪಾಯಕಾರಿ ಅಣುವಿಕಿರಣವನ್ನು ಹೊರಹೊಮ್ಮಿಸುವುದನ್ನು ತಡೆಗಟ್ಟುವ ಪ್ರಯತ್ನವಾಗಿ ಹೆಲಿಕಾಪ್ಟರ್‌ಗಳು ನೀರನ್ನು ಹಾಯಿಸುತ್ತಿವೆ.
ಜಪಾನಿ ಆತ್ಮರಕ್ಷಣಾ ಪಡೆಯ (ಎಸ್‌ಡಿಎಫ್) ಎರಡು ಸಿಎಚ್-47 ಹೆಲಿಕಾಪ್ಟರ್‌ಗಳು ಸಮುದ್ರದ ನೀರನ್ನು ಹೇರಿಕೊಂಡು ರಿಯಾಕ್ಟರ್‌ಗಳಿಗೆ ಹಾಯಿಸುತ್ತಿವೆ. ಇದೇ ವೇಳೆ ಇನ್ನೊಂದು ಹೆಲಿಕಾಪ್ಟರ್ ಗಾಳಿಯಲ್ಲಿ ವಿಕಿರಣದ ಮಟ್ಟವನ್ನು ಅಳೆಯುತ್ತಿದೆ. ಇಂದು ಫುಕುಶಿಮಾ ಅಣುಸ್ಥಾವರದ ನಂ.3 ಹಾಗೂ ನಂ.4 ರಿಯಾಕ್ಟರ್‌ಗಳನ್ನು ತಂಪಾಗಿಸುವ ಪ್ರಯತ್ನ ನಡೆಸಲಾಯಿತು. ಈ ರಿಯಾಕ್ಟರ್‌ಗಳನ್ನು ತಂಪಾಗಿಡುವ ವ್ಯವಸ್ಥೆಯು ವಿಫಲಗೊಂಡಿರುವುದರಿಂದ, ಅವುಗಳ ಇಂಧನ ರಾಡ್‌ಗಳು ಕರಗತೊಡಗಿ, ವಾತಾವರಣಕ್ಕೆ ಭಾರೀ ಪ್ರಮಾಣದಲ್ಲಿ ಅಣು ವಿಕಿರಣ ಬಿಡುಗಡೆಗೊಳಿಸುತ್ತಿದೆ.
ಮುಂದಿನ ಕೆಲವೇ ತಾಸುಗಳಲ್ಲಿ ಈ ಕಾರ್ಯಾಚರಣೆಯು ಇನ್ನಷ್ಟು ಚುರುಕುಗೊಳ್ಳಲಿದ್ದು, ಟೋಕಿಯೊ ಪೊಲೀಸರು ಜಲಫಿರಂಗಿ ಟ್ರಕ್‌ಗಳ ಮೂಲಕ ರಿಯಾಕ್ಟರ್‌ಗಳಿಗೆ ನೀರನ್ನು ಸಿಂಪಡಿಸಲಿದ್ದಾರೆ
ಫುಕುಶಿಮಾ ಅಣುಸ್ಥಾವರದ ನಂ.3 ಹಾಗೂ ನಂ.4 ರಿಯಾಕ್ಟರ್‌ಗಳಿಗೆ ನೀರನ್ನು ಹಾಯಿಸುವುದಕ್ಕೆ ಪ್ರಥಮ ಆದ್ಯತೆ ನೀಡಲಾಗುವುದು ಎಂದು ಸರಕಾರದ ಅಣುಶಕ್ತಿ ಹಾಗೂ ಕೈಗಾರಿಕಾ ಸುರಕ್ಷತಾ ಏಜೆನ್ಸಿ ತಿಳಿಸಿದೆ. ಈ ಎರಡು ರಿಯಾಕ್ಟರ್‌ಗಳು ವಿಪರೀತವಾಗಿ ಕುದಿಯುತ್ತಿವೆ ಮತ್ತು ಅವುಗಳಿಗೆ ಪೂರ್ತಿಯಾಗಿ ಮಾಡು ಹೊದಿಸಲಾಗಿಲ್ಲ. ಇದರಿಂದಾಗಿ ಅವು ಅಧಿಕ ಪ್ರಮಾಣದಲ್ಲಿ ವಿಕಿರಣವನ್ನು ಸೋರಿಕೆ ಮಾಡುತ್ತವೆಯೆಂದು ಅದು ಹೇಳಿದೆ.
ಭೂಕಂಪದ ಬಳಿಕ ಈ ವಾರದ ಆರಂಭದಲ್ಲಿ ಈ ಎರಡೂ ರಿಯಾಕ್ಟರ್‌ಗಳಲ್ಲಿ ಭಾರೀ ಸ್ಫೋಟ ಸಂಭವಿಸಿತ್ತು.ರಿಯಾಕ್ಟರ್‌ನಲ್ಲಿರುವ ನೀರಿನ ಉಷ್ಣಾಂಶವು ಸಾಮಾನ್ಯವಾಗಿ 40 ಸೆಂಟಿಗ್ರೇಡ್‌ಗೆ ಏರಿದಾಗ, ನೀರು ಆವಿಯಾಗತೊಡಗುತ್ತದೆ ಹಾಗೂ ಅದರಲ್ಲಿರುವ ಅಣು ಇಂಧನ ರಾಡ್‌ಗಳು ವಿಪರೀತ ಬಿಸಿಯಾಗಿ, ಕರಗತೊಡಗುತ್ತದೆ. ಮತ್ತು ಅವು ಭಾರೀ ಪ್ರಮಾಣದಲ್ಲಿ ಅಣುವಿಕಿರಣವನ್ನು ಬಿಡುಗಡೆ ಮಾಡುತ್ತವೆ.
ಈ ವಿಕಿರಣದ ಸೋಂಕಿಗೆ ಒಳಗಾದ ವ್ಯಕ್ತಿಗಳು ಕೆಲವೇ ದಿನಗಳಲ್ಲಿ, ವಾರಗಳಲ್ಲಿ ಅಥವಾ ಕೆಲವು ವರ್ಷಗಳ ಬಳಿಕ ಮಾರಣಾಂತಿಕ ಕಾಯಿಲೆಗಳಿಗೆ ತುತ್ತಾಗಿ ಸಾವನ್ನಪ್ಪುತ್ತಾರೆ.ನಂ.1 ರಿಯಾಕ್ಟರ್‌ನಲ್ಲಿ ಅಂದಾಜು ಶೇ.70ರಷ್ಟು ಅಣು ಇಂಧನ ರಾಡ್‌ಗಳು ಹಾನಿಗೀಡಾಗಿವೆ ಹಾಗೂ ನಂ.2 ರಿಯಾಕ್ಟರ್‌ನಲ್ಲಿ ಶೇ.33ರಷ್ಟು ಅಣು ಇಂಧನ ರಾಡ್‌ಗಳು ಜಖಂಗೊಂಡಿವೆ ಎಂದು ಅಣುಸ್ಥಾವರವನ್ನು ನಿರ್ವಹಿಸುತ್ತಿರುವ ಟೋಕಿಯೊ ಇಲೆಕ್ಟ್ರಿಕ್ ಕಂಪೆನಿ (ಟೆಇಪಿಸಿಓ) ತಿಳಿಸಿದೆ.
ಈ ಮಧ್ಯೆ ಈವರೆಗೆ ಹಾನಿಯಾಗದೆ ಉಳಿದಿದ್ದ ನಂ.5 ರಿಯಾಕ್ಟರ್‌ನಲ್ಲೂ ವಿಪರೀತ ಬಿಸಿಯೇರಿರುವ ಕಾರಣ ಅಲ್ಲಿ ಕೂಡಾ ನೀರಿನ ಮಟ್ಟ ಗಣನೀಯವಾಗಿ ಕುಸಿದಿದೆಯೆಂದು ಎಂದು ಅಣುಸುರಕ್ಷತಾ ಏಜೆನ್ಸಿ ತಿಳಿಸಿದೆ.